Gestsson

Jólin, forsetinn og rakettur

2008-01-03T12:58:00.000-08:00

Þá er maður búinn að upplifa jól og áramót. Það er nú meira fjörið.
Á jólum fara plönturnar sem eru venjulega inn í stofu og ný planta (sem borið er fram: prrrrbrr) er sett í staðin. Þau kalla hana jólatré. Það sem best er við hana er að á hana eru sett ljós (borið fram: ljóutz). Alveg fullt af ljósum. Þau eru falleg og gaman að rannsaka þau.

Á áramótum er enn meiri ljósaveisla. Menn brenna stjörnuljósum sem eru ofsalega spennandi og flugeldarnir líka og ætla ég svo sannarlega að láta til mín taka við þá um leið og ég má.

Í morgun var verið að tæma ruslaföturnar fyrir utan. Ég ruglaðist smá og hélt að að væri verið að sprengja flugelda og vildi alls ekki fara úr glugganum.

Svo fór ég á mitt fyrsta jólaball í dag. Það eru skemmtilegar samkomur, sérstaklega á Bessastöðum. Það laðast að manni alls konar menn, en jólasveinunum þarf maður að passa sig á, þótt þeir séu óneitanlega spennandi. Þá er gott að koma sér í selskap með forsetum og harmonikkuleikurum. Þeir virðast vita hvernig maður á að haga sér nálægt svoleiðis mannskap.

Fimmtán mánaða á fleygiferð

2007-09-13T10:57:00.000-07:00

Maður er orðinn heimsborgari, búinn að fara til London og allt. Ég labbaði um allt British Museum og skoðaði gamla hluti.

Eins fór ég í Húsdýragarðinn um daginn og fór í minn fyrsta bíltúr undir stýri...

Verð að viðurkenna að mér fannst ég vera orðinn talsvert fullorðinn eftir ferðina.

Orðinn ársgamall

2007-07-01T13:30:00.000-07:00

Nú er ég orðinn eins árs. Það er mun merkilegra en að vera 0 ára. Ég var eins og margir merkismenn að heiman á afmælisdaginn, þið sjáið kannski hvar.

Já, alveg rétt ég var í Legolandi. Í tilefni dagsins fékk ég minn fyrsta ís. Reyndar ætlaði mamma bara að leyfa mér rétt að smakka, en á afmælisdaginn fær afmælisbarnið að ráða og svona góðan ís er ekki hægt að láta frá sér aftur.

Þegar maður er svona duglegur að borða ís kemst maður í fullorðinna barna tölu!!!
Má maður ekki bara vera örlítið stoltur af því?

Stækka sífellt meira

2007-06-04T16:43:00.000-07:00

Ég er orðinn svo rosalega stór. Kann orðið að stríða og er alltaf að æfa mig í því.

Flottur

2007-03-23T18:13:00.000-07:00

Stutt kveðja

2007-01-14T16:25:00.000-08:00

Mig langaði að sýna ykkur fína traktorinn sem amma og afi í sveitinni gáfu mér í jólagjöf.

Annars er það helst að frétta að ég er farinn að klappa og iðka þá iðju ótt og títt og af minnsta tilefni.

Einnig segi ég pabbi og stundum mambabi. Svo þykjast mamma, Elva og afi öll heyra mig kalla á sig. Segi ykkur seinna hvað ég var í raun og veru að reyna að segja.

Gleðileg jól

2006-12-25T15:54:00.000-08:00

Fanný nanný sannar ágæti sitt

2006-12-10T15:14:00.000-08:00

Fanný frænka mín passaði mig um daginn. Hún tók þessar myndir til að sanna að hún réði við verkefnið.

Ég er farinn að halda í leiðangra og held mig þannig ekki alltaf á mottunni.

Eins og sést er ég orðinn ansi pattaralegur og er næstum alltaf kátur.

5 mánaða !

2006-11-10T14:12:00.000-08:00

Ég er orðinn 7,5 kg, sem er 114% þyngdaraukning frá því að ég fæddist. Ég er 68 cm sem er 30% lengdaraukning. Miðað við þennan vöxt verð ég orðinn hærri en pabbi eftir 39 mánuði. Mamma er að gefast upp á að halda mér söddum, þannig að ég er farinn að fá svolitið mikið spennandi á kvöldin. Graut. Ég tók þessari viðbót fagnandi og reyni að rífa skeiðina af pabba og mömmu, þetta gengur nefnilega svo óttalega hægt hjá þeim. Ég er búinn að fá svona lík fínan stól og farinn að sitja við eldhúsborðið ásamt öðru heimilisfólki.

Ég er búinn að læra að velta mér og nú er næst að læra að skríða. Ég er nú þegar farinn að sýna smá takta í þá átt, en þegar ég næ tökum á því er eins gott að pabbi og mamma haldi smádóti í burtu svo ég setji það ekki upp í mig.

Þarna er ég nýbúinn að velta leikgrindinni minni. Mamma heyrði mikinn skarkala inni í stofu, en ég var bara að sanna að ÞETTA ER EKKERT MÁL FYRIR AUÐUN PÁL

Svo er ég kominn með tvær tennur. Þær eru í neðri góm. Ég kann afskaplega vel að fara með þær og er duglegur að sýna þær þegar ég brosi. Það er bara ekki búið að ná mynd af því, þeim hlýtur að takast það fljótlega..

Réttir og flensa

2006-10-01T15:08:00.000-07:00

Jæja, þá er maður búinn að fá flensu í fyrsta sinn. Það var nú svosem ekkert alvarlegt, smá hor í nös, en pabba og mömmu fannst samt ástæða til að fara með mig á læknavaktina til að láta hlusta mig. Læknirinn spurði fyrst hvort ég væri á leiðinni á Norðurpólinn, svo hvort miðstöðin í bílnum væri biluð og svo að lokum hvort mamma mín væri að reyna að sjóða mig. Okkur skilst að honum hafi þótt ég helst til of mikið klæddur. En nú er ég orðinn sprækur og er að æfa mig að velta mér, en það er ekki alveg komið. Það vantar bara herslumuninn.

Ég fór í réttirnar um daginn, í annað skiptið. Síðast vissi reyndar enginn af því, ekki einu sinni mamma. Amma prjónaði lopapeysu á mig í tilefni dagsins. Þessar kindur voru afar merkilegar og rétt að fylgjast með þeim.

Skírður

2006-09-15T15:07:00.000-07:00

Jæja, síðan síðast hefur nú heilmikið gerst. Ég er kominn í kristinna manna tölu. Það gerðist á sunnudaginn var í Ólafsvallakirkju og það var Sr. Axel Árnason sem skírði mig.

Skírnarvottarnir og nú guðforeldrar mínir, þau Ingimundur Árnason og Þóra Birgisdóttir, voru kvödd upp í altarið til að þau misstu ekki af neinu. Þau bera víst mikla ábyrgð á tilvist minni, en þau kynntu foreldra mína hvort fyrir öðru. Gott hjá þeim.

Ég er ofsalega hrifinn af henni Elvu stórusystur. Í hvert sinn sem hún segir eitthvað fer ég að brosa, því hún kann sko að koma öllum í gott skap.

Lífið líður áfram

2006-08-25T13:40:00.000-07:00

Maður stækkar og stækkar og lærir meira og meira.

Mamma og pabbi vilja endilega ná myndum af mér brosandi, en það er ekki alveg auðvelt að brosa, því maður áttar sig jú á því að þetta tæki sem þau taka myndirnar með gefur frá sér ljósblossa sem fer illa í augun. Þess vegna er eðlilegt að manni sé ekki bros í huga þegar maður sér þau munda það. Mamma náði þó nokkrum brosmyndum.

Hún er nú alltaf jafn æðisleg hún mamma. Ef ég brosi bara smá eða horfi á hana með ákveðnum hætti, gerir hún allt fyrir mig. Það getur verið að hún myndi nú gera samt, en maður verður að vera viss og sjarma smá.

Fiskabúrið er ofsalega spennandi. Uppgötvaði það um daginn og er ofsalega skemmtilegt að fylgjast með fiskunum synda fram og til baka.

Ég fékk ömmu í heimsókn um daginn. Þá brosti ég svona til hennar...

...og hún á móti

Svo er ég farinn að spjalla um daginn og veginn við þá sem vilja. Ég er ekki viss um að það skiljist allt sem ég segi, en ég geri amk mitt besta og einn daginn læra þau þetta.

Nóg í bili, það verður vonandi styttra í næstu uppfærslu

Loksins uppfærsla

2006-07-30T14:23:00.000-07:00

Þetta eru nú meiru letingjarnir þessir foreldrar mínir. Ég hamast við að borða og stækka, meðan þau eru bara að gera eitthvað annað. Kannski eitthvað með að þvo fötin mín, skipta á mér, fæða mig og hugga þegar mér er illt í maganum en samt... Þau mættu allavegana láta aðeins oftar vita hvernig ég hef það.

Ég er nefnilega orðinn hrikalega stór og flottur. Fór í læknisskoðun þegar ég var 6 vikna og var þá mældur 5,2 kg og 59 sentimetrar. Maður kann þetta!

Bara svo þið getið séð að ég er að segja alveg satt, koma nokkrar myndir. Ég er búinn að læra að brosa. Það er ofsalega gaman að sjá hvernig fólk bregst við þegar ég er að æfa mig að brosa.
Ég er svo mikill töffari í þessum fötum frá Möggu Sæm að það spruttu fram á mér unglingabólur. Þær þroskuðust sem betur fer fljótt af mér.

Hérna er ég með Elvu stórusystir í galla sem Jónína, vinkona Elvu gaf mér. Pabbi og mamma keyptu kjól á hana í stíl. Ekki neitt smá flott. Allavegana er pabbi sérstaklega ánægður með litinn.

Við fórum í sumarbústað og þar leyfði Elva stóra systir mín mér að prófa að liggja í sínu rúmi, í nýju rúmfötunum. Það var alveg ótrúlega spennandi.

Álfheiður frænka kom í bústaðinn og var ofsalega sæt að syngja fyrir mig, 2 lög 2 sinnum þegar ég var eitthvað ósáttur við að fara að sofa. Mikið er ég heppinn að eiga svona góða frænku.

Þarf frekari vitnanna við?

2006-07-04T14:15:00.000-07:00

Ekki að pabbi hafi haft miklar áhyggjur en ég held að þessi mynd af honum frá því að hann var á mínu reki, geri allar DNA rannsóknir óþarfar.

Hvað þá þessi

Stóra systir komin heim

2006-07-03T14:01:00.000-07:00

Nú er stóra systir loksins komin heim. Hún var í Danmörku þegar ég fæddist og kom heim þegar ég var orðinn 19 daga gamall.
Mér finnst hún ofsalega skemmtileg, held að ég kannist við hana frá því að ég var í maganum á mömmu.

Fyrsta grillpartýið

2006-06-29T02:55:00.000-07:00

Í gær var heilmikið um að vera. Hjúkrunarkonan kom og vigtaði mig og skoðaði. Ég er orðinn 3.950 grömm, hef þyngst um 400 grömm á 6 dögum. Það er líklegast vegna þess að mér finnst ofsalega gott að drekka sem mest og vill helst vera sísaddur. Er alltaf að hugsa um það eiginlegast, þegar maginn er ekki að stríða mér með lofti og svoleiðis.

Um kvöldið fór ég til Fanný frænku og Bjarna í grillpartý. Á boðstólnum fyrir mig var það sem mér finnst best, mjólk.
Þau hin fengu sér eitthvað annað, en mér er alveg sama um það, ég skemmti mér amk vel. Þarna fékk ég auga á eitthvað sem mig langar að drekka úr.

Hálfsmánaðar gamall

2006-06-25T15:33:00.000-07:00

Maður er barasta orðinn 14 daga gamall. Var aðeins að reyna að lyfta hausnum í dag, þegar Fanný frænka kom í heimsókn.

Var aðallega að hafa fyrir þessu þegar ég var að leita að brjósti, en það er það besta sem ég veit.
Fór annars í bað áðan. Það er barasta þrælþægilegt að vera í vatninu.

En ekki eins þægilegt að fara upp úr. Manni getur kólnað við það

En það er ekkert sem góður sopi getur ekki lagað.

Maður braggast vel

2006-06-22T14:54:00.000-07:00

Í dag kom hjúkrunarkonan og vigtaði mig. Ég hef þyngst vel og er orðinn þyngri en ég var þegar ég fæddist. Það er víst ofsalega fínt, sérstaklega fínt þar sem ég gubba stundum svoldið þegar ég er búinn að drekka hjá mömmu.

Kristján Frosti frændi minn kom líka í heimsókn og fékk að halda á mér.

Smá göngutúr

2006-06-21T15:13:00.000-07:00

Í dag var veðrið svo æðislega gott að við gátum ekki stillt okkur um að fara í smá göngutúr. Ég er víst alveg í það minnsta í að fara svona út, en það kom ekki að sök, veðrið var svo gott og ég í svo góðum fötum.

Fyrsta baðið

2006-06-18T14:43:00.000-07:00

Jæja, þá er maður búinn að prófa þetta sem fólk kallar bað. Ég var nú ekki viss í fyrstu hvort þetta væri nú sniðugt, en svo komst ég nú að því að þetta er nú barasta allt í lagi.
Balinn sem ég var baðaður í var reyndar frekar lítill, þannig að ég náði að spyrna vel í, en ég er nokkuð viss um að hann verði eitthvað stærri næst.

Hæ hó jibbí jei

2006-06-17T08:09:00.000-07:00

Það er kominn 17. júní. Langafi kom í heimsókn í dag. Áttum við afskaplega góða stund saman. Eins gott, því foreldrar mínir hafa ákveðið að ég eigi að heita Auðunn Páll Gestsson. Ég heiti sem sagt í höfuðið á langafa mínum í föðurætt, sem heitir Auðunn Gestsson og Páli Bjarnasyni móðurafa mínum.

Taldi Auðunn Gestsson eldri að ég myndi standa vel undir nafni. Við langafgarnir og nafnarnir lögðum okkur saman á eftir.

Ljósmóðirin

2006-06-16T08:34:00.000-07:00

Nú er lífið hægt og rólega að komast í fastari skorður. Ósk ljósmóðir kemur næstum á hverjum degi og passar upp á okkur og gerir ýmsa skrítna hluti, eins og í gær, þegar hún potaði í mig og tók blóð úr hælnum á mér. Það var ekkert þægilegt og mótmælti ég hástöfum, en allt kom fyrir ekki. Ósk fékk sitt fram og pabbi og mamma vildu ekkert hjálpa mér.
Á eftir var gott að leggja sig og hlýja sér undir teppinu sem Álfheiður amma prjónaði upp úr sér.

Kominn heim

2006-06-15T03:46:00.000-07:00

Jæja, þá er ég kominn heim til mín.

Ég fór heim í fötum sem Vigdís frænka prjónaði handa mér. Verð að segja að ég tók mig afar vel út í þeim, mannalegur satt best að segja.

Ég er mikið í vöggunni minni, þar sem grjónapúðinn sér um að maður geti haldið viðeigandi reisn. Höfuðið er nefnilega svoldið þungt ennþá, en það kemur.

Ég fékk ofsalega flott blóm frá þeim sem voru að vinna með mömmu í Eystrasaltsráðinu í Svíþjóð, en ég er víst búinn að fara þangað nokkrum sinnum. Man það bara ekki.

Halló Heimur

2006-06-14T08:46:00.000-07:00

Ég er kominn. Fæddist 11.06.2006 á Landspítalanum kl 13.29, var 52 cm og 14 merkur. Fæðingin gekk bara nokkuð hratt og vel fyrir sig, loksins þegar mér þóknaðist að láta sjá mig. Elva systir sem var búin að bíða spennt eftir að ég kæmi í heiminn, var á leiðinni til Danmerkur þegar ég lét slag standa, þannig að ég þarf að bíða í næstum 3 vikur eftir að hitta stóru systur mína.

Ég hlakka til kynnast ykkur öllum og heiminum

Hérna eru nokkrar myndir af mér fyrstu dagana:

Nýfæddur í fanginu á mömmu

Ljósmóðirin mín var alveg frábært, hún heitir Steinunn Blöndal. Mæli með henni...

Pabbi að klæða mig í föt í fyrsta skipti.

Hér hefur maður það gott